SuaraHKBP.com || Ndang hapalang las ni roha molo dung sahat ulaon hasintuaon di tingkina. Songon na masa di HKBP Perumnas Tangerang (5/6/22). Ninna pandita resort ma: Na marpungu do hita nuaeng di bagas joro ni Tuhanta rap dohot sintuanta na naeng mandalani ombas pensiun sian ulaon hasintuaon.
Ima inanta St Sinurmala Br Marbun, 65 taon/11 April 1957 (Ny Mulia Budi Aruan (+) sian huta linngkungan wilayah Perum III, rap dohot inanta St. Tiorli Br. Siahaan 65 taon/5 Juni 1957 (Ny Morrys Simanullang (+) sian huta lingkungan wilayah Gandring.
Nunga digohi Nasida tingki dohot parsuruan ni Tuhanta Jesus Kristus Raja ni Huria i mangaradoti ulaon hasintuaon hombar tu pangundukhonon nasida di tonga-tonganta manipat dibagasan na 12 taon, tolu bulan St Sinurmala Br Marbun dung tarjou nasida gabe Calon sintua 14 Maret 2010 jala manjalo tohonan Sintua di ari 28 Oktober 2012.
Dohot 10 taon lima bulan St Tiorli Br Siahaan dung tarjou nasida gabe calon sintua 2 Desember 2012 jala manjalo tohonan sintua di ari 21 September 2014.
Alani i tama pasahatonta hamauliateon ni rohanta tu Tuhanta i naung mandongani jala margogoihon huhut patauhon nasida saleleng on laho mangulahon na sahat tu nasida.
Angkup ni i tama do pasahathonta mauliate nang tu nasida naung mangaradoti ulaon panghobasion di tohonan nasida i di tongatonga ni hurianta na saleleng on.
Marojahan tu aturan dohot paraturan HKBP (2002: Amandemen III/2019) di naung boho umur nasida 65 taon (11 April 2022 dohot 05 Juni 2022) sadarion on paborhatonta mauliate nang tu nasida naung mangaradoti ulaon panghobasion nasida mandalani ombas pansiun mamungka sadari on, Minggu Pentakosta 05 Juni 2022.
Marende ma jolo huria : Marhite Ende puji pujian: BL 212 *Parohon HarajaonMi*. Parohon Harajaon Mi sahalaM do i; Dibahen i o Jesusi ndang jadi sundat i/Alai anggo eme i, ndang olo marparbue i; ianggo so na mate i/Di na buni di tano i; denggan do i,dibaen na mate i.
Didok pandita ma tu nasida. Di hamu dongan na hinophop ni Tuhan Jesus i. Nunga digohi hamu pangoloion na pinadanhonmuna na jolo uju manjalo tohonan sian Tuhanta i, mandok: Sahat ula ulaonmi! Alani tama do unduk hamu mandok sadarion mandok mauliate tu Tuhanta i na patauhon hamu marhobas hombar tu tohonan na sahat tu hamu. Na tama do nang huria on manghamauliatehon tu adopan ni Tuhan Jesus Raja ni Huria i huhut mangido asi ni rohaNa anggiat parbue ni na hinobasanmuna na saleleng on gabe pelean na hushus jala mamboan pasupasu tu hagaganda ni na porsea dohot hatotogu ni haporseaon di angka hinobasanmuna.
Dungi didok pandita ma muse Marhite tangiang: Sai tambai ma hiras ni roha dohot hahipason nasida laho mandai hinauli ni tingki pansiun songon jolma na na marpanghilaan, na marroha jala na martondi hombar tu lomo ni roham.
Togutogu jala ramoti ma nasida di angka ari-ari ni hatuaonnasida tu joloan on, asa tongtong nasida manaili tu ho di bagasan sandok lomo ni rohaM, ai sian Ho do haroroan ni hadameon dohot sude sonang ni roha di bagasan Tondi Parbadia.
Pasu-pasu ma nang sude keluarga ro di sisolhotnasida, asa rap mangolophon jala manghamauliatehon pasupasu na jinalo nasida sian Ho.
Angkup ni i marpamuati ma rohaM di nasida muda hagaleon, dohot hahurangan nasida di nasa pangulaon, parsaoran dohot panghobasion nasida di tongatonga ni huriamon, sesai ma i ala holong ni rohaM dohot asi ni rohaM.
Manjaha SK Pensiun ni nadua sintuai, najinaha ni Pdt M Pasaribu. Ninna pandita uluan ma : Ale St Sinurmala Br Marbun dohot St Tiorli Br Siahaan (huhut masijalangan). Mardongan pos ni roha di Debata Ama, dohot anakNa Tuhan Jesus Kristus dohot Tondi Parbadia i, sadari on, Minggu Pentakosta, 5 Juni 2022, hupaborhat ma hamu mandalani ombas Pansiun sian ulaon Hasintuaon i. Selamat Pansiun ma di hamu, ninna Pandita resort M Sidabutar.
Mandok hata ma sian inanta nadua naung pansiun. Mandok hata mauliate tu Tuhanta ala Tuhanta do na tongtong mandongani dohot mangaramoti gulmit ni ngolunasida, jala saleleng mandalanhon hasintuaon nasida.
Atik adong na sala di panghobasion, di langka manang na hurang dasip di panghobasion nasida. Nasida mangido maaf. Tu dongan sintua, tu angka ruas do tu sude tahe. Hirahira ido astuan ni hata sambutan nasida.
Mandok hata ma muse utusan ruas ni huria, sahalak utusan ni Dewan, sahalak utusan Sian Parhalado laos pasahat cenderamata (tintin mas) na gabe tanda asa adong do siingoton nasida. Dung sidung parmingguon dipatupa ma acara ramah tamah. (HDL)
Be the first to comment