Otoritas ni Bibel
Nihalashon do di tingki na parpudion tekad mandok: “mulak tu Bibel” (back to the Bible) di tonga-tonganta. Ai sian i do dapot hita panandaon na sintong di Debata na sintong jala na terungkap (Deus Revelatus), marhite haroro ni Tuhanta Jesus Kristus tu portibi on.
Alai semangat mulak tu Bibel na mansai jebu di manang piga dongan pola sipata ndang boi be tabedahon antara ni back to the Bible dohot back to basics. Memang taakui do otoritas ni Bibel. Alai adong do mara molo tadok na holan Bibel i sambing do otoritas sumber ni panandaon na sintong di Tuhan Debata. Ai ala ni on do umbahen marribu mansam gareja di portibi on, masiboan hapintoranna marhite Bibel, alana nasa ragam ni paham, pendirian dohot pandapot boi do dipintori marhite Bibel.
Hape adong do tolu otoritas na gabe sumber ni panandaonta na sintong di Debata i ma Huria (Gareja), Bibel dohot pengalaman pribadi (somal didok halak Inggeris Inner Light, Cahaya Dalam) Alai sayangna ndang sapandapot sude angka na porsea taringot tu kedudukan ni otoritas na tolu on.
Adong do tendensi mangondolhon sada sian na tolu i, di ginjang ni na dua nari. Jala on ma na gabe singkam mabarbar ni perpecahan ni huria ni Kristus. Huria Roma mandok Huria do otoritas partimbo laho naek banding molo adong pandapot na marasing-asing. Protestan umumna mandok Bibel do otoritas partimbo.
Jala kaum Quaker dohot angka donganna sarombang, tarmasuk aliran pentakostal, mangondolhon soara ni Tondi Parbadia, pangungkapon langsung tu sasahalak manang na didok inner light do otoritas partimbo.
Hape di ganup horong on adong do mara. Ai molo marondolan tu Huria, olo do madabu tu ekklesiastisisme, gereja adalah pendeta, pendeta adalah gereja. Songon nidok ni Gereja Katolik, gereja adalah uskup, uskup adalah gereja, uskup adalah bene esse gereja.
Na mangondolhon Bibel do otoritas partimbo, olo do madabu tu mara biblisisme dohot bibliolateri (pemujaan Alkitab). Jala di horong na mangondolhon inner light, mara subyektivisme boi do tarjadi. Ai beha do bahenon mambedahon soara ni Tondi Parbadia sian angan-angan manang halusinasi?
Hape sasintongna nian ndang maralo otoritas na tolu on, ndang adong pertentangan segitiga, alai dua sian na tolu i, marfungsi mangontrol na sada nari. Ndang sahat tu ahu Bibel anggo ndang na dipeop Huria jala ndang boi huantusi Bibel i anggo so na diajari Huria jala marhite Tondi Parbadia. Ajaran ni Huria olo do lilu molo ndang marondolan tu Bibel, jala Huria mangolu ala pangulaon ni Tondi Parbadia. Soara ni Tondi Porbadia boi do diverifikasi marhite Bibel dohot Tradisi Huria.
Jadi hita na dohot semangat na timbo mulak tu Bibel, manat ma hita sotung gabe madabu tu biblisisme, apalagi bibliolateri. Mansai denggan do back to the Bible, alai molo palobihu boi do marmara. Sada contoh ni biblisisme, ala didok Tuhan Jesus tanoman marisi holiholi ni na mate dohot nasa na rotak, gabe adong parjamita mandok, angka na lilu do halak na laho (ziarah) tu tanoman, angka na naeng marsomba tu na rotak do halak i, ninna. Adong muse do dongan Kristen na daulat mandok manang ise halak Kristen boi do mandidi (mambaptis) ai ndang adong tarsurat di Bibel na ingkon holan pandita boi mangulahon i.
Jala unang ma tapagelleng peranan ni huria, ai ise ma hita, pintor boi mangantusi na tarsurat di Bibel i. Hape huria, palumean ni Bibel i, nunga mangadopi marragam tantangan na dua ribu taon on. Sada contoh, adong do na so manjalo peranan ni huria, na manolak konfesi na nirumushon ni huria, ai bahen-bahenan ni jolma do i, ninna. Hape marondolan tu Bibel do huria mangarumushon konfesi sian tingki tu tingki laho mangalusi angka masalah na diadopi dohot patigorhon angka ajaran na lilu.
Adong muse do na so manjalo otoritas ni huria, pendekna porsea di Tuhan Jesus na tinandana marhite Bibel, jadi ndang porlu gabe ruas ni sada-sada huria na tarida i di tano on ai ruas ni huria na badia, huria hatopan na so tarida i (the invisible, holy, catholic Church) do ninna ibana.
Hape ianggo ndang ala ni gareja na tarida i, ndang sahat Barita na Uli i tu hita jala boi taantusi. Jadi hita na dohot semangat na timbo mulak tu Bibel, tong ma hita manat so tung madabu hita tu biblisisme lumobi tu bibiolateri. Jala hita na mauas umbege soara ni Tondi, urapan Roh Kudus, na pola mambahen angka pangaradeon na marsitutu asa masuk Tondi i, manat hita sotung madabu tu subyektivisme, sotung tadok soara ni Tondi hape halusinasinta do.
Ndang tarbuktihon dohot gamblang, alai sai adong do fenomena tarida, gabe ndang tarupirhon sian roha sungkun-sungkun manang naung godang do angka pangula/pandita di HKBP naung madabu tu ekklesiastisisme, na mambahen otoritas ni Bibel di toru ni otoritas ni Huria. Sai unang ma nian. Alai molo tung naung adong do i dapot di hurianta HKBP, ba, masipaingotan ma hita asa mago i sian hurianta.
Palumean ni Bibel
Nunga 125 taon dung dipalumehon Tuhanta tu hita bangso Batak Bibel i. ai tutu do antong, na ditodo Debata hita (bangso Batak) gabe palumean ni Hata-Na? Bangso na metmet situtu, na primitif, ninna deba pengamat, na so masuk tu etongan, na maringanan tarisolasi di solot-solot ni Bukit Barisan na maol boluson, gabe palumean ni Bibel? Ai haru Padri ndang tarhona mangislamhon bangso on, dung ditaluhon jala ditaban angka artana, ditinggalhon do.
Bolanda pe ndang marasa porlu manjajah bangso on, nang pe naung sahat tu Barus dohot tu Sumatera Timur. Ai huroha pagellenghu, terlalu insignifikan, ndang adong untung sian i. Hape dipillit Debata gabe palumean ni hata-Na. gabe olo ro sungkun-sungkun, ai na toho iseng do Tuhan i dipillit Batak siroaroa i? Ndang na iseng Tuhan i, alai sadalan doihot rencana abadi-Na do mamillit bangso Batak i gabe bangso parbibel. Jadi tepat do molo tadok, Bibel ma na umuli situtu na hea ditean bangso Batak.
Molo tahaporseai do na sadalan tu rancangan abadi ni Debata do pamilliton i, jala gabe arta tean-teanan na umuli sian sude tean-teanan na adong di Bangso Batak do Bibel i, tontu adong do kewajibanta. Ai adong do tujuan ni Debata di pamilliton i. ai ndada homitan Bibel i, sisimpanon di inganan na buni. Alai songon na nidok ni Tuhan i do tu halak Israel na jolo: “Hupadiri hamu gabe bangsongku, Ahu gabe Debatamuna, asa gabe pasupasu hamu tu angka bangso na humaliang hamu!”
Bible dohot Bangso Batak
Na parpudi on sai dipertentangkan do Injil dohot habatahon. Adong do angka seminar dipatupa martemahon; “Adat dan Injil”, “Injil dan Adat Batak.” Adong do angka buku dohot artikel di angka majalah disurat taringot tuson. Bahkan adong do angka seminar i na pinatupa manang disponsori HKBP, baik di tingkat huria, di resort, di distrik bahkan di tingkat hatopan.
Judul ni angka seminar i pada umumna memberi kesan na maralo do adat Batak dohot Injil. Ai molo didok adat dan Injil, di hata sileban adat versus Injil, lapatanna adat diperhadapkan, dipertentangkan, dengan Injil. Gabe dirimpu angka hami kaum sederhana, kaum awam (yang kurang mengerti), na mambege judul ni seminar i, na maralo do adat Batak tu hakristenon. Laos adong muse do angka dongan naung mandapot karunia mansai jonok tu Tuhan, na merasa berwewenang mamvonnis atas nama Tuhan Jesus, na kafir do adat Batak i, kuasa gelap do i, jala angka sipelebegu do na mangulahon adat Batak.
Hape sungkun-sungkun do roha, ai adat dia do na hinataan ni angka parseminar dohot angka panurat dohot parjamita/evangelis i? Ai adat na adong nuaeng, adat naung tatean do i sian natorasta dohot ompungta naung Kristen, ai nunga lobi 140 taon budaya Batak mangalami proses pangkristenon.
Molo didok ulaon ni missi di Tano Batak adalah volkschristianisierung, pengkristenon ni Bagso Batak, nunga termasuk disi pangkritenon ni budaya Batak. Jadi adat/budaya na tangaholuhon nuaeng, nunga adat/budaya Kristen.
Hape angka dongan, lumobi angka dongan na marsaksi naung bertobat jala diselamatkan huhut naung niurapan ini Tondi Parbadia, ninna, sai adong do na tongtong berkutat mengenai adat Batak i, hape so tinanda adat na hinataan nasida i, ai adat nahinan do i, adat tingki so sahat Barita na Uli tu Tano Batak. Jala ndang adat ni sipelebegu sasintongna na hinataannasida di angka seminar i, ugamo ini sipelebegu do. Ianggo ugamo ni sipelebegu, memang tangkas do i maralo tu Hakristenon.
Diskusi na lobi topet didok roha nian, ndada adat Batak versus Barita na Uli, alai nunga sadia bagas hataridaan (obyektivasi) ni nilai kristiani na sian Bibel di ngolu ni halak Batak, di budaya ni bangso Batak. Dung lobi saabad dikristenhon halak Batak, nunga sadia bagas dibatakhon hakristenon i? Lapatanna, nunga sadia intensif nilai kristiani na sian Bibel i mewarnai ngolu kultural ni komunitas Batak. Nunga sadia bagas Hata ni Debata manirai adat/budaya ni batngso Batak. On do nian sirefleksihononhon di angka diskusi, lumobi ma di na marningot hita naung 125 taon bangso Batak mar-Bibel. Ndada mempertentangkan budaya Batak dohot Barita na Uli.
Bible dohot HKBP
Na parpudi on mansai godang do kritik ditujuhon tu HKBP. Godang do kritik i na bersifat membangun, jala patut hamauliatehononhon jala siparateatehononhon, alai godang do tong kritik i na bersifat kecaman manang manguhumi. Adong do mandok ndang jumpang, manang ndang mangula, Tondi Parbadia di HKBP. Adong do mandok ndang mangolu hata ni Debata di HKBP, dohot lan dope na asing na negatif. Angka kritik/kecaman on ro sian bagasan songon i nang sian duru. Nian songon pandok ni Cyprianus, ndang porlu botoon aha didok halak angka na sian duru, lumobi sian dongan naung maninggalhon huria (HKBP).
Alai nang pe songon i, laho mangalusi sude angka kritik/kecaman i denggan do ra molo dipangke HKBP alus ni huria Anglikan mangadopi angka kecaman na ditujuhon tu nasida, i ma: patuduhon ma tu hami manang aha na tangkas diaturhon di Bibel i na so diajarhon di HKBP, asa huajarhon hami; patuduhon ma tu hami manang dia pangajaran dohot pangulaon ni HKBP na tangkas maralo tu Bibel asa hutinggalhon hami.
Jala maradophon pamangkeon ni Bibel, dihatindanghon HKBP do, isarana; dipertahanhon do supremasi ni Bibel na gabe ojahan ni sude masalah na marpardomuan tu ajaran (doktrin), konfesi dohot pangulaonna; dipertahanhon jala dhatindanghon do haporseaon (iman) sesuai tu isi ni Bibel; angka jamita di HKBP totop do marondolan tu Bibel; sai disosoi HKBP do ruas asa ringgas manjaha Bibel; dipatupa do parpunguan rutin, songon punguan ina (somal digoari Mararikamis), naposobulung, sermon parhalado huria, laho manjaha/mambege Hata ni Debata na sian Bibel i; di Almanak HKBP na terbit ganup taon, disurathon do disi ayat harian sian Bibel, jala dijadwal do disi perikop sijahaon manogot dohot sijahaon botari.
Panimpuli
Songon panean huhut palumean ni hata ni Debata, tontu boi do dohononta, na tean-teanan na umuli do Bibel i di hita halak Batak, naung manorusi roha parbagasan ni ompungta dohot natorasta, na mamboan nilai baru tu pandangan hidupnasida, na memengaruhi angka sinta-sinta dohot panghirimonnasida, songon i dohot na mengendalikan angka tindakannasida. Jala na paling utama i ma na manguba secara menyeluruh, secara total, destiny. ngolu ni bangso Batak.
Ala ni i patut ma hita nian marjubileum, di bagasan las ni roha marolopolop manghamauliatehon denggan basa ni Deata na mamparhaseang bangso sieteketek i dijou gabe bagso-Na, na paruar sian hagolapon. Hape di taon 1994 i, apala di tingki naung saratus taon hita gabe bangso Bibel, ndang tarpadirgak simanjujung ala ni arsak bolon, ndang tarhona marolopolop ala ni na masa di HKBP tingki i, na nota bene, HKBP do na gabe hasandaran ni palumeanon di Bibel i. Jadi songon gantina, naeng ma nian Oktober 2019 on tabahen gabe bulan parolopolopon.
Manang na memang tanda-tanda ni kegagalanta do on sebagai panean sekaligus palumean ni Bibel i? Molo i do, ganti ni parolopolopon, ro ma hita manungkap tu adopan ni Tuhanta, tasolsoli ma kegagalan i, tatopoti ma angka kesalahanta jala tapaimbaru ma tekadta huhut mangelekhon Tuhanta asa unang diunsat tean-teanan dohot palumeanon i sian hita. Asa sinodang ni Hata ni Debata naung nalnal hatiuronna di tano dohot bangso Batak unang ma mintop ro di salelenglelengna. Jadi Oktober 2019 on naeng ma nian tabahen “Bulan Bibel.” Molo so i, tabahen ma gabe “Bulan Panopotion Dosa,” “Taon Paubahon Roha.”
Mauliate ma Amang Pardenggan Basa, di denggan ni basa-M na marsuru agka naposo-M ro tu tano Batak mamboan Barita na Uli, jala dibuhai Ho roha ni angka ompungnami, marhite Tondi Parbadia, manjalo, mameop jala manghangoluhon Barita na Uli i huhut manorushon i tu hami angka pinomparnasida gabe dohot hami taruli di haluaon na binoan ni Tuhannami Jesus Kristus. Pargogoi ma hami manorushon i tu pinomparnami. Amen.
(Oleh: Mika Panusunan Lumban Tobing)
Be the first to comment