BIBEL BATAK 125 TAON

Jala 125 taon ma bangso Batak gabe bangso Bibel (people of the Book) Jala hasandaran ni palumean na tu bangso Batak on Huria Kristen Batak Protestan (HKBP) do. Ra tu sipareon ni deba dongan songon na tarlalu lancang do statemen on begeon, alai unang lupa hita realitas sejarah na HKBP do hataridaan ni pangulaon ni Debata di Tano Batak, marhite angka naposo-Na Parbarita na Uli.

BIBEL BATAK 125 TAON

SuaraHKBP.com | Di taon 1894, sidung ma dirongkom Padan na Robi na sinalin ni PH Johansen tu hata Batak. Gabe singkop ma sude Bibel i dihatabatakhon. Ai Padan na Imbaru nunga dihatabatakhon (Toba) Ompu i Nommensen di taon 1878, marsurat Latin dohot marsurat Batak, jala tu hata Batak Angkola sidung disalin A Schreiber di taon 1879.

Jadi di taon 2019 gok ma 125 taon umur ni Bibel Batak. Nunga 125 taon hape bangso Batak naung gabe dohot panean di hata ni Debata. Ndang holan i tahe, 125 taon ma naung gabe palumean (custodian) ni hata ni Debata bangso Batak.

Jala 125 taon ma bangso Batak gabe bangso Bibel (people of the Book) Jala hasandaran ni palumean na tu bangso Batak on Huria Kristen Batak Protestan (HKBP) do. Ra tu sipareon ni deba dongan songon na tarlalu lancang do statemen on begeon, alai unang lupa hita realitas sejarah na HKBP do hataridaan ni pangulaon ni Debata di Tano Batak, marhite angka naposo-Na Parbarita na Uli.

Di taon 1994 na salpu i marjubileum parolopolopon hian ma hita nian marningot naung saabad Bibel Batak. Alai tingki i, ndang tarpadirgak simanjujung, ndang tarbahen marolopolop siala ni arsak bolon binahen ni hagunturon na masa di HKBP (palumean ni Bibel i) Haru pingkiran pe ndang laho tusi, ndang ‘tarhona’ marjubileum.

Tinaringotan do on di huria/ressort lokal tingki i, alai ndang adong respons. Ndang binoto manang na ditorushon do usul on tu tingkat distrik dohot tu Pusat. Alai huroha ndang sanga mamingkirhon i, apalagi patupahonsa.

Alai apala na mambahen songgot roha, reaksi ni angka dongan ruas ni HKBP do, tingki tinaringotan on tu nasida (ndang ala ni hagunturon na masa di HKBP i) Reaksi ni manang na piga dongan targombar do sian hata ni sada sintua HKBP senior jala sarjana kawakan di bidangna, na mandok: “Ai so hujaha hami be Bibel i, Alkitab na ma hupangke hami!”

Songgot roha ala mambal situtu do alus i, ai ndada substansi ni masalah pokok dikomentari. Alai sian alus on boi tarida, na hurang menghargai sejarah (sense of history) hurang manghangoluhon dohot manghamauliatehon parsahat ni Barita na Uli tu halak Batak.

Ai anggo ndang i, ra ndang tandaon ni dongan on Tuhan Jesus Sipalua jala ndang gabe sintua ibana. Na paduahon, adong gejala, huroha haluaon (keselamatan) i hurang terjamin do molo dais tu habatahon, jadi ingkon di hata Indonesia do martangiang asa sahat tangiang i, ingkon Alkitab do jahaon asa jumpung hatuaon (keselamatan).

Jadi ndang dijaha be Bibel, Alkitab na ma! Jadi, tabahen ma nian parningotan naung 125 taon bangso Batak mar-Bibel. Oktober on, di na marolop-olop hita (HKBP) marningot naung 158 taon HKBP, laos di si ma nian tapestahon parolop-olopon 125 taon Bibel Batak.

Parsahat ni Hata ni Debata tu Tano Batak

Hasisingkop ni Bibel i dipadas tu hata Batak do naung 125 taon. Ianggo hata ni Debata na sian Bibel i nunga 170 taon dung tarbege di Tano Batak jala di hata Batak. Ai boi do ra dohononta Richard Burton dohot Nathaniel Ward sian Baptist Mission Society of England do na parjolo patubegehon hata ni Debata di Tano Batak, i ma di taon 1824.

Jala hata ni Debata na dipatubegehon di si i ma; “Patik na Sampulu i, holong ni roha ni Debata di hita jolma na tarida di pangalehon-Na di Anak-Na Tuhan Jesus Kristus. Dipatorang do haheheon sogot, jala diigil do hamubaon ni roha.

Alai ndang diantusi natorop jamitanasida i. Alai mamungka sogo ma roha ni angka raja dung dijamitahon ‘ingkon jolo metmet jala tardidi asa masuk tu harajaon ni Debata,’ ai ndang lomo rohanasida jolo metmet gabe paluaon. ‘

Molo so paro hamoraon tu hami haroro ni tuan i, ndang pola tinggal di tongatonganami hamu, dumenggan ma mulak tuan i tu tanona’ ninna angka raja. Ndang olo hami paubahon adatnami, ai na denggan do adatnami, molo so parohon hamoraon nilangkahon ni tuan i, ndang loasonnami tinggal tuan i di hami on.’1

Mangihuthon barita, nunga mulai disalin Burton sabindu Musa I (Genesis) dohot saotik sian Evangelium ni si Johannes. Alai adong do tong na mandok naung satonga ne Bibel King James (Authorized Version, AV) dihatabatakhon ibana. Ndang binoto manang na gabe tu dia terjemahan i dibahen dung mulak nasida sian Tano Batak.

Dung i di taon 1859, haruar ma Buku I Musa (Genesis) dohot II Musa (Exodus), Evangelium ni si Johannes dohot si Lukas na hinatabatakhon ni HN van der Tuuk, jala di taon 1867, Evangelium na dua nari (Mateus dohot Markus) dohot Ulaon ni Apostel.

Sudena on dirongkom di surat Batak. Alai ala di Tano Bolanda do dirongkom angka Buku on, ra ndang godang i maredar di Tano Batak di mulana i. ndang binoto tangkas manang na sadihari dimulai ibana na manghatabatakhon i, manang na di tingki di Barus ibana manang dung mulak tu Tano Bolanda. Ndang binoto manang na adong do angka buku on dipeop HKBP manang na dapot di Perpustakaan Nasional di Jakarta.

Jadi sian taon 1824, secara verbal nunga mulai tarbege hata ni Debata di Tano Batak, songon sinondang na metmet situtu, na alangalang tarida songon hirdop ni lampulampu. Alai lam marbalga ma sinondang ni Hata ni Debata dung ro van Asselt dohot angka donganna tu Angkola.

Lam tu tiurna ma muse sinondang i dung sahat Nommensen dohot angka donganna tu Pusok ni Tano Batak. Lam nalnal ma muse sinondang ni Hata ni Debata i dung sidung dipadas Nommensen Padan na Imbaru tu hata Batak Toba di taon 1878, Schreiber padashon tu hata Batak Angkola di taon 1879.

Dung i gok ma sinondang i ni hata ni Debata di Tano Batak dung singkop dihatabatakhon P.H. Johansen, Padan na Robi i, di taon 1894. Jala sian asi ni roha ni Tuhan Debata, sinondang ni Barita na Uli i sai torus ma marsinondang di Tano Batak, na so tupa mintop ro di saleleng ni lelengna.

Sihalashonon jala sihamauliatehononhon do na boi Bibel i disalin tu Hata Batak tanpa mangalami angka hambatan, molo taingot do beha maolna angka bangso na asing manalin Bibel i na jolo tu hatanasida be.

Ra hea do tabege beha maolna perjuangan ni halak Jerman laho manalin Bibel tu hatanasida. Songon i muse molo tajaha perjuangan ni halak Inggeris laho manalin Bibel i tu hata Inggeris pola sahat tu pangaleleon dohot na sumeahon hosa.

Sian sihol ni rohanasida asa boi donganna sabangso manjaha hata ni Debata di hatanasida sandiri, songon John Wycliffe, Tindale dohot Coverdale. Adong do sian nasida pola sahat tu na sumeahon hosa. Jala hira sude terjemahan andorang so Bibel King James (Authorized Version) di daratan Eropa do dirongkom jala diselunduphon tu Inggeris. Di hita ndang adong na songon i. On ma sada sihamauliatehononta.

Na paduahon molo tajaha do angka dokumen taringo tu pangulaon ni Ompu i Dr Nommensen dohot Pdt. P.H. Johansen, tarida do disi na mansai sibuk situtu do nasida ganup ari sian sogot manogot sahat tu robot borngin.

Lumobi P.H. Johansen, tamba ni ulaonna na mansai godang jala borat, huhut do ibana marniae ala ni sahit na posa dohot angka arsak ni roha bolon na songgop tu ibana, mabalu dohot tilahaon boru namarbaju. Hape disangahon jala dironggoshon do manalin Bibel i. Ndang binoto tangkas manang na marsurat tangan do dibahen manalin manang na adong mesin tik.

Tung tua bolon ma tahe halak on di bangso Batak, na manghapadothon ulaon i nang pe songon i ronsot jala borat ni ulaonnasida na asing, gabe boi hita halak Batak manjaha Hata ni Debata di hatanta sandiri jala gabe dohot hita panean jala palumean ni Hata ni Debata na mangolu i.

Tarombo ni Bibel

Ndang tangkas binoto manang na sian manuskrip dia do dihatabatakhon Padan na Imbaru dohot Padan na Robi i na gabe Bibel Batak i. Jadi ndang binoto tangkas manang sian hata dia do Bibelta i disalin. Sian hata aslina do, hata Heber dohot hata Gorik, manang sian hata Jerman manang Inggeris.

Alai Ward manalin sian Bibel King James, jala van der Tuuk disura roha manalin sian hata Bolanda. Ra Nommensen dohot Johansen manalin sian Bibel Jerman. Ndang tangkas muse binoto manang na dipangke nasida, lumobi Nommensen, do sude terjemahan naung adong hian.

Disura roha dipake do i, i do ra alana umbahen boi humatop sidung dipadas Padan na Imbaru i. Alai na tangkas tarida, marasing do manuskrip ni Bibel Batak sian manuskrip ni Alkitab bahasa Indonesia. Hira jumonok do Bibel Batak to Bibel King James, manang disura roha rap marharoroan sian sada dangka ni tarombo ni Bibel do, lumobi Padan na Robi.

Alai tong do sungkunsungkun roha, hira marasing do tong manuskrip ni Padan Narobi sian Padan na Imbaru. Ala ni perbedaan ni Bibel dohot Alkitab i, gabe jotjot do tarjadi sungkunsungkun di angka PHD (Patanakhon Hata ni Debata), sermon manang di parguruan katekisasi dohot kegiatan na asing.

Ala ndang rap sidung dipadas Padan na Imbaru dohot Padan na Robi, gabe ndang sada buku Bibel i di mulana i, alai dua buku, i ma Buku Padan na Robi dohot Buku Padan na Imbaru. Di mulana i Testamen na Imbaru do digoari Padan na Imbaru i. gabe adong hasomalan na jolo na manggoari buku Padan na Imbaru i Testamen jala Padan na Robi i Bibel.

Jadi molo adong usouso: “Adong do Bibelmuna?” Padan na Robi do maksudna disi. Jumotjot on masa na jolo molo dung mandapothon Pesta Parningotan Ari Hatutubu ni Tuhan Jesus, dung dijalo angka dakdanak ayat sipajojoronna. Ai antar langka do na jolo Bibel (Padan na Robi) di hutahuta.

Bangso Parbibel

Molo marningot hita di taon on, naung 125 taon dipalumehon Debata hata-Na tu bangso Batak, tontu ro ma sungkunsungkun:

1. Nunga olat ni dia peran ni Bibel i di ngolu ni halak Batak. Adong do dapot hataridaan ni naung 125 taon halak Batak gabe bangso parbibel? Adong do hataridaan ni i di ngolu kultural ni halak Batak dung gabe panean di Hata ni Debata?

2. Jala songon palumean ni Baritga na Uli, beha do tabahen i?

Patut do mangulon hita mangaranap dompak pudi laos huhut mambahen refleksi manang introspeksi, nunga sadia bagas Hata ni Debata na di Bibel i mewarnai budaya ni Bangso Batak di bagasan na 125 taon on.

Nunga olat ni dia bagas ni Hata ni Debata manorusi ateate ni angka natorasta na jolo dohot hita nuaeng on? Adong do peran ni Hata ni Debata mempengaruhi angka harapanta dohot sintasintanta? Nunga tarida hapataran ni panghangoluhon ni Hata ni Debata di parulanta siapari dohot mengendalikan angka tindakanta? Adong do hataridaan ni nilai Bibel di budayanta? Molo tapangke definisi ni budaya sebagai obyektivasi ni nilai-nilai luhur na adong (mangolu) di masyarakat, beha adong do dapot obyektivasi ni angka nilai na sian Bibel di budaya ni masyarakat Batak nuaeng on? Manang dohot pandohan na asing, nunga olat ni dia Bibel i manirai budaya Batak.

Sastra dan Seni

Maol do on alusan ala hurang do di hita kriteria na gabe songon acuan ni penilaian. Tumangkas on nian tarida di angka sastra na berkembang di bangso i do. Disi do boi tarida angka pandohan (idiom, ungkapan) na sian Bibel i gabe dipake di ngolu siapari di masyarakat.

Laos sian angka sastra i do boi tarida manang na niilhaman ni Bibel do angka panurat i manang ndang. Sayangna, ndang berkembang satra Batak na saratus taon on. Hampir ndang adong angka turiturian manang buku roman ni Batak na 125 taon on.

Jadi ndang boi hita menilai sian satra Batak. Senilukis manang senipahat pe ndang berkembang, jadi bidang on pe ndang adong boi tapake songon acuan. Lukisan na hea niida berupa jiplakan manang maniru lukisan sian Eropa do. Ndang adong dope hea niida lukisan khas Batak manggombarhon peristiwa manang pribadi na adong di Bibel.

Hata Siapari

Sada nari na boi pangkeonta songon acuan i ma panghataion ariari. Adong do manang na piga ungkapan sian Bibel naung gabe memasyarakat di panghataion siapari di tongatonga ni masyarakat Batak, i ma songon: “Ah, si Tomas do ho!”, “E, Judas!”, “si Lansarus”, “ondeng”, “hadio na rara”, “manna.”

Alai ndang apala godang dope naung gabe bagian ni hata siapari, molo binandinghon tu bangso na asing. Di hata Inggeris, umpamana, dao dope gumodang naung bagian ni hata siapari na di hita ndang apala memasyarakat dope songon angka ungkapan: “Money is the root of all evil” (ai urat ni hajahaton do roha na holongan tu hepeng); “Am I my brother’s keeper?” (Ai ahu siparorot anggingki?”) “Pride before before a fall” (Matua ginjang ni roha do patujolo ni hajempolon) Man does not live on bread alone” (Ndang holan sagusagu hangoluan ni jolma); ”the house of Rimmon” (kompromi Rimmon) “the Damascus Road” (dalan tu Damaskus); Gareja Mateus 5:10 (julukan Gereja Rusia na ‘marsomba’ dohot tunduk tu Pamarenta Soviet) dohot lan dope na asing. Alai di angka na mandok hata di angka acara adat songon di unjuk, na monding, mamasuki jabu dohot na asing, nunga hira sude marondolan tu isi ni Bibel jala nunga lam tu godangna na mangutip angka ayat sian Bibel.

Etika dohot Etos

Asing sian angka hataridaan na konkrit, penilaian na ummaol bahenon i ma pengaruh nilai-nilai Bibel di etika Batak. Mansai hirim do nian roha angka Bataici (Pemerhati budaya Batak) di tongatonganta mambahen pengamatan na serius taringot tuson. Mangolu do etika Kristen di tongatonga ni bangso Batak? Angka pandita na mambuat kursus S2 manang S3, naeng ma nian adong mamillit subyek on bahen skripsi manang tesisna.

Na jolo i andorang so ro Hakristenon mansai ketat do etika Habatahon, tergolong bersifat puritanistik, lumobi ma etika seksual.2 Dung 125 taon marbibel, boi do dohononta naung diperkaya etika na bersifat teonomik (marondolan tu Patik ni Debata) kode etik ni halak Batak?

Songon i muse etos kerja ni halak Batak, nunga boi dohononta naung bersifat kristiani manang tong dope sarombang dohot etos kerja ni angka na so mananda Tuhan Jesus dope? Manang dohot pandohan na asing, adong do terbentuk suatu karakter (na positif) na khas di halak Batak paboa naung gabe panean di Hata ni Debata?3

Tamba ni fungsi ni Bibel songon ojahan ni hakristenon, ternyata gabe sada buku sastra Batak na uli do Bibel Batak i. Ternyata boi do Bibel i diterjemahkan tu hata Batak hampir 100%. Ai mansai otik do hata sileban dipangke di Bibel i ala ndang adong padananna di hata Batak, isara ni soldadu, harpa.

Jadi cukup kaya do hata Batak i. Ala ndang godang kepustakaan ni hata Batak, jadi nunga gabe songon ‘museum’ ni hata Batak Bibel Batak i. Jadi tamba ni panandaon na sintong di Debata na sintong i, huhut do Bibel Batak i berfungsi melestarkan hata Batak.

Na paduahon, gabe sada buku sastra na uli situtu do Bibel Batak i. Ai nang pe terjemahan i sian hata sileban jala marharoroan sian Timur Tengah, alai tercipta do godang angka ungkapan-ungkapan hata Batak na uli situtu na bernilai sastra na timbo, na boi mambahen bergetar tali ni pusu-pusu. Jadi tamba ni na memperkaya sastra Batak Bibel i huhut do gabe sada buku sastra Batak na uli.

Pamangkeon ni Bibel

Boi do dohonon na Bibel do na gumodang dijaha jolma di portibi on jala nunga disalin singkop manang sabagian, tu sekitar 1000 parhataan. Alai adong mandok Bibel ma sada buku na mansai maol antusan jala na mansai mura situtu sala antusan (one of the least understood and the most misunderstood of books) 4 Ndang apala tangkas binoto manang na tongtong do hita mengacu tu Bibel di tingki naeng mambahen keputusan di ngolunta siapari, manang di tingki naeng mambahen penilaian.

Alai adong do tendensi di hajolmaon (ndang holan di halak Batak) na mangalului pamintoran ni pendirianna manang pemahamanna sian Bibel. Jadi adong do di hita tendensi mamangke–manang sala mamangke–Bibel laho mangkonfirmasi hasintongan ni sada-sada pandapot manang anutan.

Dapot angka na anti marisap do sian Bibel na sala (dosa) marisap. Alai angka parisap pe dapotsa do sian Bibel na mandok na so sala marisap. Songon i nang mangan/anti sangsang. Angka na anti dohot pro-porang (merpati vs rajawali), tunduk manang mamberontak tu panggomgomi na otoriter, manginum minuman keras, manampin lotere, kebebasan manang pengayoman paternalistik, ibadah formal (‘tenang’) manang ibadah ‘ramai’, sude mangalului hapintoranna be sian Bibel laho mempertahankan anutan manang pendirianna be.

Di Indonesia on nuaeng pamintorion i mamangke hata alkitabiah. Molo dung didok na alkitabiah do pendirianna i, ndang tardok be manang aha. Nang pe na menentang tong do mangklaim na alkitabiah do dasar ni argumentasina.

Pangantusion ni Katolik taringot tu Huria (ekklesia) marondolan tu Bibel do. Suang songon i do Protestan. Alai laos songon i do tong Pentakosta, Quaker, Adventists dohot angka na asing. Jala godang do mameop Bibel di jabuna be, alai godang do ndang hea dijama parjabu i gabe marhapal orbuk di lampakna i. Khusus tu halak Batak Kristen, godang Bibel i dipamasuk tu batang ni na mate (asa di tanoman i pe huroha jahaonna Bibel i. (bersambung)

(Penulis: Ir. Mika Panusunan Lumban Tobing)

IKLAN

BUKU KERJA KERJA KERJA MAU

1 Comment

  1. Horas ma Amang
    mansai las do roha manjaha pangguritan ni Amang on, jala adong do nian panghirimonniba bolas manjaha Bibel na marsurat Batak i, manungkun ma jo iba Amang, adong do na boi diunduh Bibel Surat Batak on ?
    Mauliate

Leave a Reply

Alamat email Anda tidak akan dipublikasikan.


*


Situs ini menggunakan Akismet untuk mengurangi spam. Pelajari bagaimana data komentar Anda diproses.