PUISI : HAMINJON DI HUTA

(Oleh: Baharuddin Silaen)

Nunga tung leleng dung borhat ho sian huta,
Haminjon na di tombak i nunga mardangka jala tamba timbona
Di si do ho na jolo marmeam huhut manderes
Bulung nai ganup manogot mangerbang manjou ho mulak
Gotanai ganup ari manetek laos mangalaptak
Tarpaima do hami diharorom tu huta,

di harbangan ni huta i ndang adong be bona ni bagot,
Di si do ho na jolo maragat, sogot manogot i andorang so borhat singkola
Amang hasian, andigan do ho mulak,

dolok-dolok dohot rura jou-jou manjou ho asa dulo hutam na buni i
Andigan do ho ro tu huta,
bereng ma jolo pansur paridian mi, ndang adong be aek,
batu pe nunga dipambuat sian huta,
Soara ni pidong pe ndang tarbege be, soara ni amporik pe ndang tarbege di ladang,

tagan eme nunga paima disabi,
Amang hasian, andigan do ho mulak tu huta,
bereng jolo huta i, jou-jou manjou ho mulak,
ndang masihol ho di purik,

tataring i pe jou-jou, majou ho mulak tu huta,
sangombas pe molo ndang boi leleng di huta,
Amang hasian andigan do ho mulak,
marloni au mandulo ho tu harbangan, magira ma ho mulak,
balatuk ni jambuta i hot dope,

sian hau maranti na togos dialap sian harangan,
di balatuk i do ho na jolo marmeam rap dohot donganmu si Maringan,
Nunga timbo pangkatna, burju do ibana,

bulan na salpu mulak do si Maringan,
disuan do hau; mangga, gambiri, palia, jengkol, di huta,
Amang hasian andigan do ho mulak,
bege ma soara sian toru ni bulu, mangulus mamboan barita,
barita sian huta, manjou ho asa mulak satongkin tu huta
satongkin mulak tu huta.

***tu angka dongahu na sian huta.

 

IKLAN

BUKU KERJA KERJA KERJA MAU

1 Comment

  1. Tung mansai bagas do hata ni puisi ni Haminjon di Huta. Sai anggiat mangihut angka puisi ni situan natorop tu ari nanaeng ro. mauliate. HDL Tobing, Tangerang

Leave a Reply

Alamat email Anda tidak akan dipublikasikan.


*


Situs ini menggunakan Akismet untuk mengurangi spam. Pelajari bagaimana data komentar Anda diproses.